3年前，王祖藍拍《老表，你好嘢！》，仲係演藝學院出身嘅王祖藍，好fresh！

亦因為呢個劇，令本來做路人甲嘅王祖藍，如《學警出更》做劉家輝間茶餐廳嘅伙記仔……搖身一變依家做埋多棲藝人，建立人脈，明明做緊演員都可以享受埋使製作人嘅快感，咩都可以話事，仲打入大陸巿場兼成立工作室「手工藝」，依家搞埋製作兼出任經理人，旗下藝人有鄧萃雯、徐子珊同林欣彤，仲plan定明年製作近10個項目，瓣數多多。短短3年，由路人甲到旗下經理人公司打算搞上市，賺夠人仔衣錦還港嘅王祖藍，早排仲豪擲1億買豪宅。小演員依家變身製作人同老闆。

今日《老表》第3集《老表，畢業喇！》拜神，近年長駐大陸嘅王祖藍，滿場飛同演員打招呼，之前第1、2集已經被指導演、監製上身嘅王祖藍，今集依舊親自揀卒，搵蔡少芬取代萬綺雯，又搵欣宜同自己公司嘅林欣彤參演。

工作多自然壓力大，王祖藍今日拜神時接受訪問就話：「壓力好大，上次有好多風波，今次張繼聰要生仔，王菀之要開演唱會，嗰班有毛有翼，所以臨時搵咗欣宜、林欣彤佢哋頂上。今次劇本出得有啲急，對我嚟講好大壓力。」問到張繼聰會唔會客串？祖藍答：「佢會客串做幾集，佢太太大肚要照顧明白嘅！」至於王菀之，祖藍就笑住講：「睇吓之姐心情啦，之姐佢又話呢排演唱會好忙，突然又問我係咪可以客串，我問佢想點，o依家都係睇吓之姐心情啦！」

来源：苹果日报